O artista xaponés Riusuke Fukahori naceu en 1973 e ten unha interesantísima técnica coa que elabora as súas obras: debuxos de peixes que se converten en cadros hiperrealistas, pintados sobre superficies tan distintas como madeira, vasos de plástico, cazos ou mesmo baldosas rotas. Mediante pinturas acrílicas e resina transparente consegue enganar ao ollo humano.
O tipo de técnica que executa Fukahori é comparable ao proceso das impresoras 3D. Con serenidade e perseverancia, Riusuke pinta os goldfish intercalando entre cada man de pintura unha película de resina. Deste xeito obtén un efecto tridimensional que achega realismo tanto á auga como ao volume dos peixes. E namentres, este artista recoñece estar descubríndose cada vez que utiliza o pincel, coma se entrase nun estado de profunda meditación.
Ningún comentario:
Publicar un comentario