Adriana Barreiro gaña o premio á mellor colección de traballos de fin de carreira do alumnado da Escola de Arte Mestre Mateo de Compostela. Reproducimos a entrevista que lle fan en La Voz de Galicia (11 de novembro 2015) con motivo da concesión do premio:
POR JOEL GÓMEZ/ LA VOZ DE SANTIAGO
A colección de Adriana Barreiro, graduada en Deseño de Moda na Escola de Arte e Superior de Deseño Mestre Mateo o curso pasado, foi a gañadora no concurso organizado polo centro para 13 estudantes que finalizaron esta carreira. Recebeu un premio de 500 euros, concedido por el Corte Inglés, e decidido por un xurado integrado por persoas especialistas, relacionadas con coñecidas empresas do sector. «Esta é unha colección calma, composta por seis estilismos, todos en cores brancas, moi neutras, onde os toques de máis cor eran os bordados en zonas moi localizadas do corpo», explica ao ser preguntada por este traballo.
-¿Que supón este premio?
-É o broche final á carreira, que finalicei o curso pasado.
-En febreiro representou a Mestre Mateo, en Madrid, na final do concurso estatal de escolas de moda, Talento & Co., ¿teñen relación os dous traballos?
-Si, ao ser duas coleccións tan próximas hai detalles que coinciden, onde se nota que traballei nas dúas, como utilizar tecidos naturais, algodóns e las.
-¿Como valora a participación nese concurso estatal?
-Ese concurso foi un enorme desafío para as cinco estudantes que representamos ao centro; porque Mestre Mateo era a única escola de moda pública finalista, as outras eran privadas, e moi coñecidas, polo que pensábamos que tiñan moitos máis medios que nós. Ter conseguido o segundo premio foi un bo resultado, e unha experiencia moi interesante.
-¿Que fixo ao acabar os estudos?
-Ao finalizar a diplomatura fixen o curso ponte para o grao de Deseño de Moda, e conseguín emprego nunha empresa de Arteixo, que é provedora de varias marcas de moda moi coñecidas.
-¿Responde este emprego ás súas expectativas?
-Si, deseño estampados e complementos e estou moi satisfeita. Resulta gratificante poder aproveitar as ensinanzas dos estudos de Moda de Mestre Mateo, e tamén en parte as do bacharelato artístico, que estudei no IES de Sar.
-¿Que proxectos ten agora?
-Traballar, e non descarto participar en máis certames de moda. Participar en concursos favorece a creatividade, permite manter a parte máis creativa da profesión, na patronaxe e na confección, e estar ao día en aspectos que, coa rutina laboral, poden ficar máis esquecidos.
Ningún comentario:
Publicar un comentario